四川雅安發生大地震，中港台藝人都非常關注，出錢又出力，就連日本一班AV女優亦伸出同情之手，由蒼井空帶頭率領其他姊妹，向雅安送上溫暖嘅祝福。
近年有唔少日本AV女優到國外搵銀，好似吉澤明步、周防雪子、沖田杏梨、波多野結衣咁，就曾經到中港台三地演出。不過，數到最落力到國外掘金嘅就一定係蒼井空喇！空姐夾住超強人氣進攻內地，由於佢樣子甜美又好波，又好識得講說話冧內地粉絲，所以極受歡迎。為咗幫助自己融入內地，空姐勤學普通話同漢字，周不時喺社交網露兩手寫中文書法畀大家睇。最近空姐就為雅安地震嘅災民以招牌書法寫上「四川加油 雅安平安」寄予祝福，真係好有善心。
空姐嘅行動為日本AV女優起帶頭作用，唔少知名女優如沖田杏梨、栗林里莉、友田彩也香等等，都齊齊用中文寫上祝福語及「加油」字句嘅相片放上網，為雅安地震災民打打氣。
之不過，有消息指出，相關照片可能有造假之嫌，有機會係由電腦技術加工而成。然而，我就認為係真嘅，因為照片的確可以從該班女優嘅社交網搵到，而且就算係假亦無謂深究，因為為雅安市民送上祝福真係多多都唔拘。
撰文：賢