早前喺上海舉行嘅第十屆上海國際成人用品展，吸引咗數以十萬人嚟參觀，而最令人關注嘅當然係一眾日本AV女優，今年除咗佢哋之外，連美國成人電影女星，都派人嚟出席，唔通想打入中國市場？
今年嘅第十屆上海國際成人用品展，大會一心想搞大佢，前期做咗大量宣傳，吸引咗約共一百多家廠商出席，當中除咗常見嘅日本同內地廠商外，連唔少國際一級品牌都出席今次展覽，帶嚟最新科技同埋視覺體驗。好似大家熟悉嘅LELO、FunZone、UltraZone、SKinsation、Fun factore同埋Toysheart等公司，都係海外首屈一指嘅成人用品商，唔少仲係第一次喺內地參展，仲做咗唔少生意，睇嚟佢哋都睇準內地市場，以今次展覽嚟試試水溫。
話明係海外參展商，唔少展區嘅騷女郎都係外籍模特兒，所以有網友話睇洋妞都值回票價。有性感金絲貓到場，現場觀眾當然興奮，唔少老友仲衝上台拍照，期間又攬又錫，乜水都畀佢哋抽晒，但最受歡迎嘅都係日本AV女優，因為大家都比較認識，而今次就由波多野結衣領軍，帶同一眾小師妹出席，雖然小師妹青春可人，但波多野結衣老江湖即係老江湖，師妹又跳又唱後，佢只出嚟扭吓屁股，拋吓胸，就已經令粉絲歡喜若狂，而且好識走位，冇乜人埋到佢身抽水，波多野結衣果然魅力沒法擋。
撰文：小德