近年除咗電視台嘅選秀節目，製造唔少新星之外，動漫遊戲界亦功不可沒，事關佢哋不時會舉辦大型嘅代言比賽，選出嚟嘅代表同樣要過關斬將，聲色藝俱全，就好似今日介紹嘅靚女施靜，就係動漫界新星中嘅表表者。
嚟自浙江嘉興市嘅施靜，英文名叫做Scarly，喺2009年參加網絡遊戲公司主辦嘅「昆侖之星」全國選拔賽，當時只係學生嘅佢喺嚟自全國嘅眾多靚女中，一口氣殺入總決賽，最後更艷壓群芳，奪得其中一個代言角色。事後有媒體訪問評委，點解會選中施靜，該評委話施靜樣子美麗，身材纖細，更有一雙修長美腿，而最重要係佢有少少似范大美人范冰冰，自此施靜就有小范冰冰嘅稱號。成名之後，施靜冇急於工作，只係一邊兼職模特兒，一邊繼續學業，畢業後才全力喺模特兒界發展。近年施靜不斷曝光，出席不少內地嘅大型車展，有朋友唔知仲以為佢係車模出身。
除咗做車模外，施靜更拍唔少平面廣告，當中不乏性感寫真。施靜身材高挑，稍稍性感就已經令人神魂顛倒，咪睇佢上圍只有34吋，但周不時都可以製造出波濤「胸」湧嘅驚人效果，令粉絲讚嘆不已。上年佢又參加動漫遊戲公司舉辦嘅代言選拔賽，再次喺過萬名嘅參選者中脫穎而出，爭取到「孫尚香」嘅角色，而今次嘅造型可以話落足本，加上施靜本錢十足，宣傳照一推出，馬上令網絡遊戲熱賣，而施靜亦人氣急升，事業再上一層樓，電視台馬上找佢上節目，相信好快更會有人搵佢拍埋影視作品，但希望施靜咪忘本，繼續為動漫遊戲界貢獻多啲、性感多啲就冇得頂啦！
簡介：施靜目前只有粉絲幫佢開嘅博客，內裏收藏咗不少佢嘅照片，都屬較早期，但噴血度極高。
網址：http://blog.sina.com.cn/shijing2009
出生地：浙江嘉興
三圍：34-23-34
身高：175cm
撰文：龍四海