內地嘅藝人，紅極都係喺本土，紅到去外地嘅就真係少見，嚟自上海嘅楊青倩就絕對係其中一個。佢畢業於上海戲劇學院，由於貌似安以軒，於是勇闖台灣發展，紅咗後唔少人仲以為佢係台灣藝人添。
楊青倩眼仔碌碌，身材高挑，最吸引人嘅就係擁有34吋D級豪乳，自小就好喜歡表演，唱歌跳舞瓣瓣掂。為咗充實自己，高中後就考入上海戲劇學院進修，畢業後拍咗唔少影視作品，從中磨練自己嘅演技。直至2009年，幸運之神再次眷顧青倩，滾石唱片公司簽咗佢，仲幫佢出咗張EP，四個月時間就破一萬張銷量，公司喺2010年1月就推出青倩首張個人專輯，仲開始在台灣做宣傳，出席各大小綜藝節目。由於青倩身材火辣，被封為新一代宅男女神。青倩曝光率極高，當佢回流返內地時，就有網友誤會佢係台灣女星，其實佢係地地道道嘅上海姑娘。
除咗唱得跳得之外，青倩仲有功夫底子，佢學習空手道多年，閒閒哋可以踢碎幾塊板，近年更學埋詠春拳，所以普通男士，唔係咁易埋得佢身，亦因為佢睇得又打得，一直又冇乜緋聞，好多朋友都擔心佢搵唔到男友，但青倩表示自己仲年輕，都係專心喺事業發展好啲，感情嘅嘢，一切隨緣。咁即係話各位猛男仲有機會啦！講開青倩識功夫，原來佢好想拍功夫片，小道消息就話有香港片商正打青倩主意。動作要打打殺殺，唔怕受傷咩？青倩話未驚過！咁有信心，睇嚟成事唔難，我哋就靜心等候你嘅大作面世。
簡介：楊青倩雖然係上海人，佢兩岸飛嚟飛去，facebook裏面有唔少自拍照同生活照，部分 仲大騷事業線，好鬼誘人。
網頁：www.facebook.com/lena0922
出生地：上海
三圍：34-23-34
身高：166cm
撰文：龍四海