最近英國某雜誌，專訪咗一個以瑪麗蓮夢露打扮嘅靚女，仲替佢拍咗一輯性感寫真，睇落都冇乜出奇，但原來佢嘅來頭十分之勁，據稱佢嘅表姐就係近日宣布懷有身孕嘅英國太子妃凱瑟琳，呢位表妹名叫卡特里娜•達琳，今年22歲，早喺上年9月，就已經替《花花公子》雜誌拍過寫真，仲話唔介意裸露身體，因為唔着衫嘅感覺特別舒服。身為專業脫衣舞娘嘅達琳，相信會以王妃表妹嘅身份繼續剝衫。講真達琳嘅身材真係唔差，好多網友都期待佢快啲剝光豬，三點盡露就最啱。
1月31日係日本嘅「愛妻日」，原意係要啲老公對太太好啲。嗰日就有好多做丈夫嘅，喺太太做嘢公司嘅樓下或者喺屋企門口，大大聲咁向太太示愛，聽落幾溫馨，但竟惹嚟唔少噪音嘅投訴，搞到當日最忙嘅竟然係警察叔叔。發起呢個活動嘅組織「愛妻家協會」，早喺2005年成立，佢哋每年都有一個主題，今年主題係希望丈夫們「回家大作戰」，真係畫公仔畫到出晒腸，亦都證明日本嘅男人收工後唔想返屋企，久而久之，返屋企嘅時間愈嚟愈夜，逗留時間就愈來愈短，搞到唔少太太好似守生寡，所以協會希望做老公嘅放工就早啲返屋企，好好大戰一場慰藉吓妻子。
撰文：小德