美國玩具生產商推出嘅芭比娃娃，一直深受全球嘅女孩子歡迎，後來為咗令公仔有個伴，於是推出佢男友肯尼公仔，等佢哋天生一對，就連模仿兩個公仔嘅真人，都大紅特紅。最近兩個公仔真人喺紐約碰頭，劈頭竟狠批對方整容，場面火爆。
模仿芭比嘅係烏克蘭23歲靚女Valeria Lukyanova，擁有一頭金髮，無敵嘅上圍，同埋22吋嘅小蠻腰，配埋修長嘅美腿，真係似十足個公仔，所以深受粉絲嘅支持，封佢做偶像，就算唔係芭比迷嘅男生，見到咁完美嘅囡囡，唔少人都迷上佢。而模仿肯尼嘅係嚟自美國嘅32歲靚仔Justin Jedlica，佢嘅造型同樣維妙維肖，足可以假亂真。最近兩人被邀出席活動，粉絲以為天造地設嘅一雙，終可以聚首一堂！點知兩人喺拍攝期間，就鬧起交嚟，互揭對方靠整容化妝上位。
據講係男方先發難，話女方靠戴假髮同化妝扮成芭比娃娃，點知女方一聽，就大揭男方全靠整容，話佢喺過去十年，花咗近十幾萬美金，經過九十多次整型手術，所以至變成肯尼嘅樣子，而且身上嘅胸肌同腹肌，全部都係注入矽膠，摸上手真係同公仔差唔多。而女方就直認只做過一次隆胸，其他都係真材實料。有網友就話有乜好拗，其實兩個都係假，因為佢哋只係玩緊Cosplay，希望佢哋快啲和好如初啦！
網址：www.facebook.com/valerialukyanova
撰文：小德