能夠做得英國《太陽報》嘅第三頁女郎（Page 3 Idol），唔單止要敢露，仲要樣靚身材正至得。要喺芸芸絕色美人中脫穎而出，確實絕非易事。不過Mellisa Clarke就做到呢點，成功擊敗一眾對手，成為第三頁女郎中嘅王者。
第三頁女郎一直以嚟都深深吸引男士嘅眼睛，但係要成為第三頁女郎嘅王者，難度卻相當高。除咗要有一定嘅人氣外，回顧歷史都係以高貴、大方嘅裸模至為煞食，殊不知喺上個星期五公布嘅2013年第三頁女郎選舉中，竟然由呢位今年21歲，英國出生、外形極具個性嘅裸模Mellisa Clarke以大熱姿態勝出。Mellisa形象相當前衞，單從佢大髀上大面積嘅紋身，就已見到呢位靚女有別於以往形象高貴嘅第三頁女郎，就連Mellisa對當選亦表示既興奮又意外，並話佢嘅勝出將會為第三頁女郎嘅形象帶嚟極大嘅轉變。
事實上，Mellisa一直以嚟都冇諗過自己會當選，事關唔少裸模為咗成為第三頁王者，都會出盡法寶將身材同樣貌進行後天嘅改造，反而Mellisa卻堅持自己，認為真實至係美，難怪Mellisa當選後表示：「我唔認為C Cup嘅胸部會對我造成影響，反而因為佢嘅真而覺得自豪。」Mellisa暫時仲未決定點樣利用約HK$62,000嘅獎金，反而好期待喺勝出後，能夠從事更多嘅慈善工作同埋嘗試模特兒以外嘅工作。據聞呢位曾經喺中學時代玩音樂嘅Mellisa，遲啲會喺巴黎同柏林嘅Disco客串做DJ，唔知幾時大家可以見到呢位靚女喺台上打碟呢？
雖然唔知幾時可以聽到Mellisa嘅音樂演出，但想一年365日見到呢位迷人俏女郎卻唔係難事。事關佢早排推出2013年年曆，當中有12張火辣靚相，真係可以回味足365日呀！
售價：約HK$137
出生日期：1991年9月18日
身高：5呎6吋
三圍：32C、25、32
撰文：魂