現時經濟環境波濤起伏、暗湧處處，唔少打工仔正為保飯碗而煩惱嘅時候，人氣裸模Sara Jean Underwood竟然喺微博上表示，從1月8日起失業，並表示正計劃到西班牙、意大利等地旅行。表現得如此風騷，着實令人相當眼紅！
其實又唔可以話Sara Jean Underwood喺度晒命，事關呢位今年29歲嘅索爆裸模，從05年出道起就已經相當搏命搵銀，不但出現喺各大成人雜誌封面同網站，更經常參與電影演出，當中有07年嘅《搞乜鬼大製作》（Epic Movie）、08年嘅《The House Bunny》、09年嘅《Two Million Stupid Women》及《Miss March》等。不過咪以為Sara嘅事業一帆風順，唔講唔知，佢第一份工竟然係同娛樂冇關嘅重型建築機械助理售貨員！由於佢一直以嚟嘅夢想，係希望可以從事表演嘅工作，故此Sara回憶指呢段日子係最難捱嘅時期。
雖然Sara嘅事業得意，但人生往往就係咁樣有得必有失，喺感情上卻係相當空虛。自從佢同拍咗拖２年嘅《American Idol》人氣男主持Ryan Seacrest分手後，至今感情仲係冇着落，搞到伊人早排喺接受傳媒訪問時表示，最希望得到嘅工作，就係成為一個既稱職又可愛嘅家庭主婦，並明示希望有人追。難怪Sara正計劃趁呢段失業期到歐洲旅遊玩餐飽，兼睇吓有冇異國情緣。不過溝仔還溝仔，亦不忘粉絲，Sara稱將會從歐洲買手信返嚟送畀大家，真係窩心呀！
想知Sara嘅最新動向，同埋日常生活嘅點滴，梗係要去佢嘅Fans網啦！當中不但有齊Sara呢排嘅活動及工作資料，仲會有佢嘅生活照。想進一步了解呢位性感索女嘅話，呢度絕對係首選。
網址：saraunderwood.tumblr.com
出生日期：1984年3月26日
身高：5呎3吋
三圍：32C、24、31
撰文：魂