模影模蹤：釋由美子 戰國美人

亦有一位有氣質又古典嘅美人，佢就係釋由美子喇。

脫俗靚偈

正如我哋中國人依然咁鍾意三國時代嘅人與事，日本人亦好鍾意佢哋嘅戰國時代，所以大家可以發現唔少日本電視劇、電影、遊戲、漫畫等，都以當時嘅背景作為題材，織田信長、豐臣秀吉、服部半藏等知名的戰國時代武將，大家都可能因而聽過。水着女優釋由美子亦同佢哋有關係喎，由美子本身係演員出身，同時亦擔任過模特兒，由於身材極佳，所以經常推出水着寫真。身高5呎5吋，高挑纖巧得嚟，三圍亦有34-23-34，一副S形胴體美妙得叫人迷醉。除咗身材好，由美子仲五官標致，有氣質得嚟又帶古典和風美人感覺，睇落特別清新，特別脫俗出塵。

古典美

由美子之所以擁有呢種古典美，好可能同血統有關。阿妹自己表示過，其姓氏係來自戰國時期知名武將──豐臣秀吉嘅家臣蜂須賀正勝。曾經有一段時間，蜂須賀正勝以僧人身份遊歷日本四國，當時佢就以釋作為姓氏，作為其後代嘅由美子就繼承咗呢個姓。可能因為阿妹係戰國名人後代，加上具有一派魅力十足嘅古典美，所以由美子曾經被邀演出古裝電影，好似第一次擔正主演嘅《修羅雪姬》。另外，靚女之餘又帶點剛強味嘅佢，亦適合擔演特撮片中，專門講鼓勵說話激起男主角意志嘅後勤角色，所以喺《假面騎士G》、《哥斯拉 × 機械哥斯拉》都會見到由美子。其實阿妹咁索，打扮性感少少就已經可以鼓勵人心，對白都可以慳番。

釋由美子Profile

年齡：34歲

身高：5呎5吋

三圍：34-23-34

撰文：賢