童話故事中有一則叫做醜小鴨，講述一隻初頭被同伴嫌其外表醜陋，最後變成美麗白天鵝嘅故事。現實當中，由醜小鴨變成天鵝嘅例子亦有好多，近年紅極一時嘅萬人迷杉原杏璃就係其中之一。
小弟久唔久都會約班兄弟喺周末去到油尖旺一帶嘅酒吧消遣，散場嘅時候每每都會見到，周遭嘅建築物牆壁貼滿好多宣傳夜總會嘅海報，令好多兄弟嘅目光都盡被吸引，原因係大部分海報上面都用咗佢嘅肖像，此人靚女又胸大，絕對係近年最廣為亞洲人熟悉同驚艷嘅日本水着界代表，呢位就係杉原杏璃喇！今年30歲嘅杏璃眼大有神又精靈，雖然算係水着界中嘅「耆英」，但係睇落依然青春可愛，萌味未必有同屬「耆英」級嘅星野亞希咁強，不過綺麗氣質更盛，檔次高上半籌。而比起亞希更強嘅地方，仲有身材，腰肢幼到得22吋嘅杏璃，上圍嘅36G美巨乳又大又圓，堅挺兼有強勁彈性，肌膚仲要雪白嫩滑，敢問蒼天一句：塵世間點解會有咁索嘅女仔？
見到杏璃又好樣又好波，好多人都有興趣了解阿妹嘅背景，發現杏璃阿媽個阿爺原來係荷蘭人，不難令人理解到擁有荷蘭血統嘅佢，個胸生得咁大的確有原因。不過，事實上阿妹個胸同樣貌都係近年至蛻變。2001年，杏璃加入電視台做演員，主要演出節目《麻布連接》，後來再做埋模特兒。然而，經人翻閱過杏璃當時嘅照片，發現佢塊面又圓又大成個薄餅咁，而上圍亦未見特別突出。經過多年之後，阿妹至蛻變為家陣咁索，所以有人認為佢嘅外在美全部都係後天加工。其實我就覺得呢個唔係問題，因為過程根本唔重要，最緊要就係結果令人眼前一亮。成功蛻變嘅杏璃愈來愈紅，除咗推出嘅寫真集同寫真DVD銷路極佳，由於阿妹出生於廣島，於是廣島嘅官方旅遊發展機構，就搵佢擔任當地旅遊業組織「可愛！廣島！委員會」嘅秘書，真係名副其實衣錦還鄉。
杉原杏璃瓣數極多，又自設網上商店售賣自家創作服飾，又代表廣島宣揚當地旅遊業，幸好阿妹嘅博客上除咗有其個人最新消息，仲有相關事務嘅連結，要留意其動態就方便好多。
網址：http://ameblo.jp/sugihara-anri/
年齡：30歲
身高：5呎3吋
三圍：36G-22-34
撰文：賢