雖然話家陣經濟唔好，但講到結婚呢亭人生大事，就算勒住褲頭都要去度蜜月，更何況喺個靚靚嘅環境下洞房，享受初夜嘅浪漫，絕對唔少得！美國就有旅遊網站，推選出多個至正嘅熱點，畀想為洞房花燭夜留下美好回憶嘅新婚夫婦，提供至正嘅選擇。
陽光與海灘不論係去度假定係度蜜月，都係唔少男女嘅至愛，而呢個位於太平洋海島上嘅度假酒店，更被譽為洞房嘅首選。事關佢唔單止設有大型嘅酒店，而喺海邊更設有獨立海上小茅屋，不但秘密性極高，就算喺度玩乜都唔怕嘈到隔籬，仲可以邊聽海浪同海風合奏出嚟嘅大自然交響樂邊曳曳，呢種咁正嘅洞房之夜，相信冇人唔鍾意。
講到洞房係人都想有咁浪漫得咁浪漫，既然要浪漫度爆燈，當然唔少得被譽為浪漫之都嘅巴黎啦！呢間位於巴黎嘅酒店，將浪漫提升到一個極高嘅層次。皆因佢嘅房間以融入夜空為題，不但天花板係個靚到爆嘅夜空，而地板更係配合柔和嘅燈光，營造出宇宙嘅環境，加上房內嘅極大水床，讓人有種置身夜空嘅感覺！
度蜜月兼洞房之餘，又想遠離煩囂？呢間泰國嘅酒店絕對適合不過。位於清萊叢林內嘅酒店，將酒店同熱帶叢林融為一體，每個房間都可以飽覽叢林風光，真係好似變咗做泰山咁呀！雖然話叢林景夠過癮，但點解被評為初夜洞房嘅好選擇呢？無他嘅，住喺度兼曳曳，感覺就好似打緊野戰，又唔使驚玩到中途有動物騷擾，又真係幾正呀！
冬天最好嘅活動，相信非滑雪莫屬，若然將洞房加滑雪更係一舉兩得。呢間位於瑞士雪山上嘅酒店，不但鄰近著名滑雪場，而室內更係十六、七世紀嘅古典風格裝修，入到去就好似去咗古代般，既有文化氣息又可以玩餐飽，加上雪山靚景，喺度獻上第一次真係Fit爆。
撰文：魂