男女除咗可以喺屋企曳曳，仲可以選擇去酒店爆房，只係家陣嘅酒店房大同小異，若然想讓女伴留下深刻嘅印象，讓性愛變得更加回味嘅話，何不揀間有特色嘅酒店房抵死纏綿呢？美國早排就有旅遊網站，挑選咗幾個至啱追求新鮮又有品味嘅男女嚟曳曳嘅酒店房，唔知當中邊間啱你心水呢？
呢間酒店其實係由一條位於地下一百五十五公尺嘅礦坑改建而成，單係呢點已經夠晒吸引力！呢間酒店內部裝修採用古典奢華嘅風格，而牆壁則保持原來坑嘅樣貌，因此喺房內曳曳嘅話，有可能聽到叫床嘅回音添！不過大家要留意，入住呢間酒店嘅話記得要留意指示，否則一個唔小心走入坑道深處，可能喺溶洞中迷失，甚至會去咗洞內嘅地下湖添！
喺巨型香檳杯度表演艷舞可能有人睇過，只係喺度邊浸泡泡浴，邊同心愛嘅另一半曳曳，唔知大家又試過未呢？呢間位於美國賓夕凡尼亞州嘅酒店，佢嘅豪華套房內就設有個七呎高嘅巨型香檳形漩渦浴缸，「嘥士」足夠兩個人齊齊喺裏面浸浴。此外，房內更設有一個巨型心形泳池、桑拿同高科技音響設備。播住浪漫嘅音樂，同女伴曳曳，真係正到爆呀！
對於後生得嚟，又有相當藝術品味嘅男女，呢間位於法國馬賽酒店，一間以Graffiti為主題嘅房間「Panic Room」就適合不過。唔講唔知，房內嘅塗鴉出自大師Tilt嘅手筆，藝術價值相當高之餘，而房間一半「正常」一半勁塗鴉嘅構圖，更係極具對比感同視覺效果，讓人仿似置身於兩個唔同嘅時空般。唔知喺呢間房度曳曳，會唔會動作都變得有藝術感呢？
覺得喺酒店玩感覺好逼，咁獨立嘅樹屋又點睇呢？瑞典就有間極具特色嘅樹屋酒店，共有五間設計各具特色，懸吊喺百年松樹上嘅獨立樹屋，論隱蔽性果真強絕！而當中一間鏡面玻璃屋，外面睇落去更係好似隱咗形咁，若然喺裏面曳曳，感覺真係超正！
撰文：魂