關七：+_+
英國倫敦有個成人用品店老闆，見運動會期間有咁多遊客觀光，於是忽發奇想，推出包上24K金嘅情趣用品，由於啲棒棒全部變為「金光棒」，放喺門口度金光閃閃，自然吸引咗唔少客人入去幫襯，據講生意翻兩番，日日豬籠入水，仲話唔少幫襯嘅都係亞洲客，佢哋當紀念品咁大批購入，當然令老闆笑到見牙唔見眼。
唐斬：#o#
奉勸中國遊客購買時真係要小心睇清楚，事關當地有六成以上嘅性用品都係中國製造，就算係報稱當地或歐洲生產嘅，有部分都係喺中國生產，家陣隨時可能原本十蚊八蚊嘅嘢，去到倫敦畀人浸浸金水就賣幾百英鎊，買時真係要睇清楚，咪畀人魚目混珠，否則返到嚟至知上當就喊都無謂。
溫柔：*~*
有乜所謂喎！我哋啲運動員唔係一樣咩？畀人賣去外國，人哋將佢重新包裝吓，改埋個名，再嚟參加國際大賽，一樣瓣瓣出色，有啲仲連金牌都攞埋，所以區區情趣用品，運去外國畀人改個名，仲包埋24K金搞到金光閃閃，賣貴幾百倍，甚至幾千倍又冇乜嘢咁出奇啫！
小石：^v^
我聽講東南亞好多夜總會裏面嘅小姐，都係啲內地囡囡偷偷哋走過去做，為咗掩人耳目，佢哋一樣會改個當地名，打扮到同當地嘅靚女一樣，當然叫價亦係叫最高嘅一級，傳聞做得兩三個月，收入仲好過喺老家做一年咁耐，所以想搵食就唔好怕辛苦遠遠都去，收入一定比留喺當地嘅高好多。