性感有好多種，有冶艷嘅，有健康嘅，有可愛嘅。不過，大家有冇諗過，有時性感美女都可以予人一種錯愕、驚訝嘅感覺呢？今次就為大家展示呢種令人「驚」艷嘅性感。
荷里活巨星阿諾舒華辛力加有好多經典電影作品，例如《未來戰士》系列、《獨闖龍潭》、《真實謊言》等等，而最近佢就有套經典之作被翻拍，呢套就係《宇宙威龍》喇。呢部科幻作品意念相當劃時代，當中仲出現好多外形特別嘅變種人，其中一個變種人女人仲有三個胸添。不過大家唔好以為三胸女只會喺電影出現，早前，聖地牙哥舉行嘅動漫界盛事Comic-con當中，居然有一個三胸女！嘩！真定假呀？呢個三胸女其實係荷里活女星Kaitlyn Leeb，胸前嘅三個乳房係由特技化妝而來，而佢就係以呢個形象於新版《宇宙威龍》演出，今次出席Comic-con只係為咗宣傳，大家唔使咁驚。
從唔少恐怖電影當中，大家可以睇到唔少美艷女鬼或妖女，以美色勾引男人，繼而將其害死嘅情節。呢類作品除咗帶出恐怖感覺，仲提醒男人們色字頭上一把刀，唔好見到靚女就露出獸性。不過，唔知大家見到一隻楚楚可憐，又冇衫着嘅女鬼，苦苦哀求你包養，你又會唔會心軟呢？本月中，深圳舉行第四屆深圳動畫節，期間場館內突然出現幾隻半裸，仲留住好似貞子把頭髮咁嘅女鬼，佢哋或跪或躺於地上，仲手執寫住「求包養」嘅紙牌，惹起全場哄動圍觀。其實佢哋只係表演一下行為藝術，唔係真嘅女鬼，佢哋好快就聽從現場保安嘅勸告而離開。
日本藝能界雖然有好多女星歌手行性感路線，但係一般都唔會於電視節目表演當中作性感演出，以免教壞小朋友嘛。不過，最近日本嘅超人氣青春美少女組合AKB48就嚇親一班家長喇。最近由人氣成員大島優子帶領嘅AKB48，一齊上到一個電視節目獻唱最新單曲《色彩編織格仔布》嘅時候，佢哋換上格仔裙又唱又跳，期間大島優子仲喪玩踢腿，搞到自己走光露底，麻甩佬就梗係睇得開心，但係母親們就愈睇愈驚心喇。
撰文：祖