鄧痣達：#o#：美國被喻為先進發達、自由開放嘅國家，市民大眾見多識廣，對於藝術鑑賞，更有好高嘅能力，但最近喺紐約雕塑公園內，竟有婦女聯名反對一件由廣州雕塑學院院長所設計嘅雕像，話佢意識不良，教壞細路喎！雕像係一個女性，同其他藝術品一樣係冇衫冇褲，但被評為不雅，真係唔知啲標準點定？
鄧廉魚：@o@：我上網睇過幅相，雕像嘅出位程度其實真係好普通，雕像嘅名字叫做「取與捨」，造型係手持相機自拍，唯一令人唔舒服嘅地方，就係冇咗個頭，同埋冇咗肚腩，你話佢嚇親細路都無話可說，但個師奶話會污染小孩嘅心靈，真係估佢唔到，最搞笑就係紐約巿有千五人跟住佢癲，係要當局搬走個雕像，真係服晒佢哋！
鄧嬰文：&▼& ：計我話簽名嘅人，個個都心水清，睇得出雕塑者嘅深層意思，就係話女性影相，最怕就係影到個樣同埋肚腩，因為隨着歲月洗禮，相貌同埋肚腩呢兩個位置，就係最易出賣女性嘅地方，所以拍攝時取捨，只要拍唔到面貌同肚腩，其他部分就算裸露都唔成問題，呢啲咁揭露女性深層意識嘅藝術作品，唔反對都唔得啦！
鄧逼暈：€o€：我係女人，我一定支持美國嘅婦女，呢個雕塑以自拍造型，而拍攝嘅地方就只有裸露嘅胸部同下體，你話仲唔係教壞細路，啲細路睇到，就以為同女仔影相，就只影呢兩個地方，呢啲唔係叫做污染心靈，簡直叫做荼毒小朋友呀！所以有關當局一定要搬走佢，唔係都要個雕像着番胸圍底褲或者畀套比堅尼佢着都好啲吖！