最近內地有個博士生，喺捐精期間猝死，事後得知原來佢已經係第五次捐精，至於係連續五次，定係隔咗好耐至第五次，咁就不得而知。原來喺內地，專業人士嘅精液有價有巿，而且捐精房內仲有特別服務，令男人捐精時可以加倍舒暢。
內地一般平民百姓捐精，都係無償奉獻，即係冇錢收嘅，但如果你係運動員、大學生咁又唔同，每次可以攞番啲車馬費，一般都有兩百至五百蚊不等，至於博士、教授、專業人士等，咁佢哋嘅車馬費就會相繼上調，一般都要幾千元，甚至成萬蚊嘅都有。當然，羊毛出自羊身上，希望接受捐精嘅人士，就會全數支付呢啲費用，而負責收集處理嘅就係當地設有精子冷藏庫嘅醫院，捐精者先接受身體檢查，再安排入捐精室自行解決。
捐精室內嘅設備通常有一張梳化、電視機、洗手器、傳遞窗，捐精者以前真係要寂寞地進行，但家陣就冇咁孤獨，當然唔會學AV片咁有個性感看護嚟幫你解決，而係你可以一邊睇碟，一邊進行，而且佢哋仲好有心，幫你安排埋日本片同西洋片，只要你落Order，佢哋就照播，捐精者就可以同電視內嘅靚女進行互動，當徹底解決後，就將量杯放喺傳遞窗，化驗員就會抽出樣本，並同時進行冷凍，化驗結果正常，捐精者就算完成任務，攞車錢回家。
地點：中國
語錄：捐精睇身份，乜都要講銀。
撰文：小德