最近龍崗警方勇破迷魂黨，拉咗一男一女，女嘅只有16歲，相貌娟好，身材出眾，話佢經常喺酒吧出沒，專揀一啲單身男士埋手，據報犯案都有一段日子，每次都可以輕易得手。
我哋問過當地一啲知情人士，原來有唔少類似嘅團夥喺度搵食，而呢啲女仔最常見就係喺酒吧出沒，專搵啲單身中坑埋手，因為佢哋大多數都係因工作關係而去酒吧，所以冇背景，向佢哋落手，唔怕遭人報復，加上夜晚都唔去夜場玩嘅男人，通常都係正人君子，亦係最好嘅埋手對象，囡囡會先觀察一段時間，睇吓對方有冇約朋友，如果坐得半小時都冇人嚟兼一個電話都冇打，九成都係一條冷，囡囡就會主動走埋去，通常會話自己係工廠妹，約咗朋友嚟玩，但被人放咗飛機。
囡囡跟住就會問可唔可以請佢飲杯嘢，對方見囡囡樣子娟好，大多數都會冇問題，囡囡一坐低就會打蛇隨棍上，主動同對方傾偈，囡囡只要問幾個問題，就可以摸清對方底蘊，再決定落唔落手，落手嘅話就假裝打電話通知家人遲啲返屋企，其實就係通知同黨準備一切，之後就梗係約返酒店再飲，男方一定冇意見，期間就會去小店買啲酒水，同黨就將迷藥預早放入酒水內，就算啤酒瓶現場至打開，可能早就加咗迷藥，返去一飲就會失去知覺，畀人為所欲為，所以真係要小心呀！
地點：龍崗
語錄：迷魂美少女，主動獻殷勤，預早落定藥，小心防不幸。
撰文：小德