有朋友向我投訢，話家陣喺深圳想正正經經揼骨都好難，佢話有次去揼骨，講明係齋揼，點知個囡囡入嚟冇耐，就氹佢加錢玩特別服務，朋友志在按摩，於是婉拒，囡囡之後求求其其咁按，搞到朋友十分冇癮，問我究竟點算？
其實喺深圳家陣想揼正骨，只有去啲大型水療中心至有，去呢啲大場，揼個骨自然一分錢一分貨，至於一般坊間嘅休閒中心或者桑拿場，佢哋就算喺門口話有正骨揼，但客人入到去九成都變咗邪骨。點解會咁？據桑拿老總祥哥講，呢個係大勢所趨，因為骨女家陣嘅鐘錢愈拆愈少，以前揼一個骨，囡囡同公司可能五五分帳，但家陣公司佔咗大份，有啲場更係佔到八，囡囡只佔二，即係一百蚊嘅按摩費，囡囡只收廿蚊，焗住佢哋依靠小費維生，而提供特別服務就係最有效嘅搵錢方法。
點解骨場要佔咁大份呢？無他嘅，百物騰貴，人工加、租金加、燈油火蠟樣樣都加，但價錢就冇人敢加，事關骨場競爭非常之大，可以話總有一間喺左近，所以幾年嚟好多骨場都冇乜加過價，但錢從何來？咪惟有向囡囡埋手，將佢哋嘅拆帳額大幅降低，揼個骨九十分鐘囡囡只得廿蚊，咁奀邊個肯做？囡囡惟有自己諗辦法搵小費，所以一間場裏面有囡囡玩起機，又有人玩莞式放題，就係咁解，所以你想揼正骨，真係冇人睬你，除非你先醒一百蚊，但囡囡手骨唔掂一樣冇用。
地點：深圳
語錄：正骨冇錢賺，邪骨勢反彈，舒筋有所限，貼士醒莫慢。
撰文：小德