通色糜博:離婚的代價

陳小文:#v#

最近內地有個女醫生竟打入富豪榜,起初以為佢係乜嘢神醫或者發明咗乜嘢新奇藥物,原來全部都唔係,只係佢幾年前同前夫離婚,獲得22億元嘅贍養費,呢筆贍養費全部以前夫所創嘅企業股份頂替,幾年間身家暴漲,無端端搖身一變成為女富豪,呢個故事奉勸成功男子咪亂咁拋棄糟糠之妻,否則代價沉重。

十一哥:@^@

我哋兩公婆咁恩愛,心諗一定唔會,事關我同太太聚少離多,所以每次見面都會非常珍惜,我哋冇事做就喺床上翻雲覆雨,簡直殺到天昏地暗,日月無光,但最近收到個壞消息,就係我太太竟然有外遇,仲話要同我離婚,所以話有時婚姻維持唔到,唔一定係男人嘅責任,女人都要負好大嘅責任。

楊忠寶:*o*

其實男人喺外面逢場作戲偶然玩吓都冇乜大不了,最緊要就係玩還玩,時時都要顧住頭家,否則只顧住自己玩,咁頭家實散晒,到時太太要求你賠償幾多人身同精神損失,你一定無話可說,惟有賣當借都要賠畀個老婆,不知幾多男人都係咁樣搞到自己份身家冇晒,最慘離婚後連小三都走埋,最後變得一無所有。

同路人:$o$

其實贍養費未必男人畀女人嘅,有時女人畀番男人都有可能,最重要係大家仲想唔想喺埋一齊,如果情已逝,甚至各有所愛,又何必再強行糾纏呢?爽爽快快了斷仲好,而平時一直負責養家嘅,為了保障另一半將來嘅生活,而提供贍養費係非常合情合理嘅事,好似我離過三次婚,就最有經驗講呢番說話。