楚流香：#^# 最近唔睇電視都唔知有咁多人喜歡打泰拳，而且除咗男仔之外，原來仲有好多靚女添，搞到我都心思思想學埋一份，但係又怕打沙包會打到啲手手腳腳好痛，最大鑊就係同師兄切磋，萬一將我俊俏嘅面孔打到破相，咁咪賠了夫人又折兵？但見到啲靚女又忍唔住自己嘅獸性，真係令人唔知點好，各位師兄有冇好建議？
露小鳳：+^+ 我之前都玩過吓，仲一連報咗四五間拳館添，喺裏面真係識到唔少女仔，有啲仲十分主動，識唔夠幾日，就約我出去飲酒直落，唔知係咪佢哋體力特別好，食量特別驚人，搞到我腳仔軟至走得，足足瞓咗三日床至起得身，但事後至知，原來佢係鳳姐嚟嘅，再見時仲畀咗張八折卡我，叫我得閒多啲幫襯，真係畀佢激死。
花毛缺：6<6 家陣啲拳館開咗唔同嘅班畀初學者，按佢哋嘅興趣同埋體能嚟報讀，唔會話一入門就要打沙包或者畀師兄當沙包打，而且想識女仔，最好就報纖體減肥班，因為會有好多靚女嚟學，如果想挑戰難度，呢啲班通常都由女教練嚟教，佢哋樣子身材都唔錯，你話識到個女拳王，都咪話唔威！
李沉寬：9^9 如果存心識女仔，我勸你哋都係慳啲，事關裏面有唔少大師兄，對啲新嚟嘅女同學早就虎視眈眈，佢哋又型又打得，而且仲可以周不時嚟做助教，完全係近水流台嗰隻，你哋啲初哥乜都唔識，打又唔識打，肌肉又冇，同佢哋爭女，根本冇得揮，而且萬一索油索着火水，原來已經係阿嫂嘅，咁你以後嘅日子都會幾難過。