首屆高考結束，年輕男女冇嘢做，相約行街睇戲食飯，少咗讀書壓力，正好係拍拖談戀愛嘅好時候。今周桃花運最旺嘅星座，可能會有人向你表白，至於係咪理想另一半，咁就要帶眼識人。邊個星座最旺桃花，我哋馬上揭盅。
巨蟹座嘅囡囡今個星期會有意外驚喜，可能會有一個意想不到嘅人出現眼前，向你表白，你最好要有心理準備，無論想同佢繼續交往定唔想交往，回答時都要小心啲，免得一時衝動，斷了自己嘅後路，又或者傷了對方嘅心；至於已拍拖嘅囡囡，男朋友可能會向你求婚，總知驚喜會喺今個星期內發生，但同樣有分手嘅可能。
代表人物：楊雅熙
三圍：34-24-36
出生日期：7月3日
山羊座今個星期桃花運超勁，就算三唔識七嘅異性，都會被你迷倒，主動問你攞電話，當然，首要條件要好好打扮一下自己，咁先至可以發揮最大嘅魅力，唔重視外表嘅你，將會係致命傷，記住物以類聚，你不修邊幅，識嘅就係不修邊幅嘅男仔，白馬王子愛上灰姑娘，都要佢變做公主後開始，所以咪硬頸，執執個外表啦！
代表人物：梁微微
三圍：33-24-35
出生日期：1月20日
白羊座囡囡今個星期桃花運唔錯，主要原因係差唔多半年冇異性埋過身邊，踏入今個月，運氣會開始好轉，會有男士主動向你親近，當中可能有你喜歡嘅類型，但記緊不要太過心急，否則就會嚇走異性，但又不要冷若冰霜冇嚟反應，只要畀對方適當反應就可以，但記住慢慢嚟，勿操之過急。
代表人物：王洋
三圍：35-25-36
出生日期：4月3日
撰文：小德