理論上，讀得書愈多嘅人，愈了解到唔安全嘅性行為絕對有可能影響健康，更加有機會因此搞出人命，影響自己嘅前途。不過，實際上並非如此，根據美國東北大學針對女學生嘅一項調查發現，就讀年期愈長嘅女學生就愈唔鍾意用安全套，乜唔係讀得書多會令人更醒目，更注重安全咩？據講，讀書年期愈長，女學生就愈多社交活動，令佢哋成日都有機會放縱自己飲酒，喺酒精嘅影響之下，就令佢哋同異性上床嘅時候，唔理咁多，冇安全套都照做喇。
最近香港同內地都出現唔少社會爭拗，氣氛相當唔和諧。不過，唔和諧嘅除咗社會層面之外，閨房之中嘅不和諧程度亦有上升趨勢。中國性學會性醫學專業委員會最近發表咗一個調查，發現受訪女性當中，有68%女性覺得性生活唔滿足。另外，再問到前戲嘅時間，表示伴侶最多只有1至5分鐘進行前戲嘅女性佔46.3%，為比率當中最高。而負責是次調查嘅馬曉年教授就認為，前戲時間太短，加上雙方交流不足，相信正係令女方覺得性生活不滿足嘅主要原因，因此呼籲丈夫一方唔好咁懶散，做前戲要畀心機同畀時間。
撰文：小德