最近內地有個桑拿網站，訪問咗幾百個囡囡，問佢哋平時最喜歡做啲乜嘢？原來當中有近六成幾囡囡嘅答案一樣，就係喜歡去「濕平」，而佢哋喺瘋狂購物時，又最喜歡買啲乜嘢呢？馬上話畀大家知！
第四位係買衫，原本以為呢個答案，會係第一位添，點知只佔調查嘅第四位，囡囡買衫一年只會出手幾次，每次喺換季前後，就會帶足彈藥，去百貨公司或者商場實行大出血，瘋狂入貨，完事後就會好有滿足感，但平時就好少買衫。
第三位係買手袋，大至旅行袋，細至散子包，事關囡囡由於雜物太多，所以每次出街都要帶個袋至放得晒，所以一出街見袋就買，而且袋中有袋，有大有細，有時仲要襯埋衫，所以囡囡出街濕平，真係見到乜嘢袋都想買。
第二位就係買飾物，包括身上飾物同埋放喺屋企嘅小擺設，囡囡買飾物唔需要實用性，有時一句好Cute呀！就會出手，買咗返嚟唔用係另一件事，而買飾物嘅頻率更差唔多每次去濕平都有斬獲！
至於第一位就係買食物，當中包括主食同埋零食，當然囡囡買零食嘅機會更大，因為佢哋開工好收工好，行過零食店就會入貨，就算去拍拖行街睇戲，都例必去零食店入貨，所以登上第一位，絕對有理。