內地壯陽藥八成屬假貨，任你再小心都會中招，皆因唔係你蠢，而係良心商舖都畀不法供應商呃，咁情況最終受害係你！不過夜場女就一於少理，為咗搵錢居然氹啲叔父玩家買藥，佢哋手法離不開口甜舌滑冧客，有時更以夜場「專業」身份扮權威說服玩家。有巴打指夜場女會同人客話自己喺夜場做乜人都識，甚至連藥廠老闆或藥劑師都係佢啲客，簡直係信心保證！「啲女好誇張，為咗賣藥吹到天上有地下無，假如人客有懷疑，佢哋甚至攞張藥廠卡片出嚟，當然張卡片都係假嘅啦！但人客當時都迷得一陣陣，仲邊有心情分真假，囡囡最後加多句：『買咗又唔一定要食嘅，二百元咪買個保險囉！』」