內地「特產」地溝油，今期再「升呢」變「地溝酒」！講緊係有夜場將烈酒左溝右溝，飲剩、飲過都溝埋一齊，因此玩家稱之為地溝酒。驚未？細佬就勁驚，決定由今日開始謝絕一切支裝啤酒或烈酒，頂多飲用罐裝啤酒。
唔係嚇你，無良夜場賣假啤酒享負盛名，成本一支唔使五毫，難怪買半打送一打都冇有怕。而今日更有夜場職員對我爆料指「地溝酒」問題存在已久，若非早前地溝油爆出，大家根本唔會在意問題嚴重性，最起碼香港玩家唔會懷疑先喎！據職員話：「其實有幾出奇啫？內地假酒假藥賣到成行成市都冇人管啦。將雜牌廠嘅酒溝埋一齊當新酒賣，飲落肚都好安全，較為有品嘅會將同品牌嘅酒溝埋，人客一定唔會發覺有問題，到目前為止都未見人客有問題，況且飲大兩杯都係嘔番出嚟，有乜所謂吖？」吓，細佬相信經驗再豐富嘅老手都未曾聽過咁「恐怖」嘅經營哲學，依家活生生喺夜場實現，無良嘅未必係夜場，事關有指負責酒水嘅職員為咗「銷數」，結果將飲剩嘅酒水溝埋一支當新酒，存倉嘅就以零售半價私下散貨出去，一個月放十支八支，隨時執你過千銀，好過日捱夜捱啦！
特攻語錄：內地地溝油，夜場地溝酒，人客有遺漏，職員將酒偷。
撰文：鋼炮仁