細細個嘅時候，最鍾意就係聽到一段柔和嘅音樂，唔係因為小弟係樂壇中人，只係因為咁樣表示有雪糕車駛經附近，有美味嘅軟雪糕可以食。而美國最近就有一架雪糕車除咗令人勾起食欲，仲可以勾起男人嘅性慾，因為車上除咗有索女賣雪糕，仲有火辣鋼管舞表演。
雪糕即係冰淇淋，除咗小朋友鍾意食，成年男人亦非常喜愛，不過就唔係用口品嘗，而係用眼睛享受。至於點解會用眼睛吃冰淇淋嚟形容欣賞到無限春光呢？小弟以前都唔多清楚，不過見到美國邁阿密最近出現嘅呢架催情雪糕車（The Aphrodisiac Ice Cream Truck），小弟終於明白喇！呢架雪糕車同佢所賣嘅雪糕一樣色彩繽紛，然而最值得欣賞嘅並唔係架車嘅噴漆，亦唔係雪糕，而係隨車嘅一眾雪糕售賣員。呢班售賣員個個都係樣靚身材正嘅頂級索女，佢哋多數係雜誌模特兒，亦有夜總會艷舞女郎，有佢哋賣雪糕，男士們無論把口同雙眼俱有極級享受。
至於點解會有呢架催情雪糕車出現呢？話說構思係由一名邁阿密攝影師Justin Price以及哥斯達黎加女模特兒Jacqueline Suzanne諗出嚟嘅。二人某一晚喺夜總會飲醉咗之後，出到門口就突然想食雪糕，然後就諗到如果美味嘅雪糕由半裸性感美女遞到客人手中，一定可以令雪糕變得更加好食，並且有引發性慾嘅催情效果，所以就將自己嘅出品命名為催情雪糕，但並冇將催情成分加入其中。二人有賣雪糕嘅打算之後，本來想搵間地舖做生意，但係二人嘅工作性質一向都要四圍去，自己出外工作時，雪糕店要落閘就要白交租。所以諗諗吓就決定自己出架雪糕車，再搵幾個比堅尼索女幫手賣雪糕喇。
食店用到比堅尼索女促銷，其實唔係新鮮事，好似比堅尼咖啡店同比堅尼餐廳就已經出現良久，所以Jacqueline Suzanne決定唔好只係得比堅尼女郎咁單調，實行玩盡佢。點盡法？比堅尼雪糕售賣女郎間唔中會有激情演出，就係剝光豬玩人體彩繪喇！雖然重要三點一定唔會露出，但係身材曲線表露無遺，真係睇到男人眼都凸埋。另外，雪糕車一停低，除咗有索女睇，仲有精彩表演，因為車頂特別裝咗兩支長鋼管，由索女即場表演高難度鋼管舞，賣雪糕賣到咁有噱頭，真係佢至叻喇！
撰文：小德