每人每日上班工作，都會遇到唔同嘅壓力，日本嘅AV女優亦唔例外，而佢哋每遇到壓力或者唔開心嘅時候，最想去嘅地方係邊度呢？最近有AV雜誌就做咗個調查，揭露AV女優五個必去嘅減壓地點。
第五位係去拳館打拳，睇嚟係啱啱流行，女優話搵人打吓可以乘機發洩內心嘅種種不滿，打到冇晒力，出一身汗，自然壓力全消。係咪咁易呀，真係要搵對手打一身試吓至得！至於第四位，相信大家都估到，就係化悲憤為食量，女優話佢有唔開心就會走去餐廳，特別係一啲高級嘅自助餐餐廳，放開肚皮，食到食唔落為止，咁搞法容乜易變肥婆㗎！至於第三位，就係去泡溫泉，但如果冇時間兼冇錢，有女優話泡浴湯場都一樣。
至於第二位，呢個係一個最慳錢嘅方法，但有冇效果就因人而異，就係去兒時嘅遊樂場玩，女優話去遊樂場玩吓滑梯、鞦韆，就會重拾童真，心裏面好多唔開心嘅嘢都會忘記晒。咁又啱，望吓啲小朋友天真無邪，真係會壓力全消。至於第一位，相信係人都會估到，同其他女性一樣就係去百貨公司血拼，但有唔少女優都好醒目，一早準備定張血拼卡，呢張卡並唔係信用額無限，剛好相反係有一定限度，等佢哋一碌爆卡就焗住停手，聽落又幾有效噃！
撰文：小德