小弟某日去到梅窩一帶行山，當地除咗風景優美之外，仲見到一群二群嘅黃牛於路上踱步，猶幸佢哋見到車都識得避開，唔會擋路，免惹起交通意外。而最近美國田納西州首府納什維爾則出現一單牛精擋路事件，我所講嘅牛精唔係牛牛練成妖精，亦唔係怒氣十足嘅牛精人物，的的確確係牛嘅精液！當日凌晨一架貨車遺留咗四個冷藏罐於公路上，令人以為入面有危險化學物品，於是報警求助。而警方同消防隊到場嚴陣以待，當佢哋打開冷藏罐時候，一陣異味撲鼻而來，發現入面原來正係用以幫母牛人工受孕嘅牛精液，最後警方成功搵番遺留牛精液嘅貨車，結束一場擋路嘅鬧劇。