今日同大家講吓日本新宿嘅歌舞伎町，事關早輪當日本女足歷史性贏到世界冠軍時，歌舞伎町就發生咗一場大火，波及咗六幢大廈，消防局大為緊張，一共出動咗三十五架消防車到場搶救，最後有驚冇險，火災中更係零傷亡。
點解咁好彩？原來發生火災嘅地方前一百米左右，喺十年前就同樣發生過一場大火，足足燒死咗四十四人，自此有關當局對歌舞伎町內嘅消防措施大為關注，如果有去玩過嘅朋友都可能發現，佢哋嘅風俗店裏面，每間房都有一個警號燈，每當響起時，囡囡就會衫都唔着就衝出房，客人謹記都要第一時間跟住走，呢個鐘並唔係警察查牌嘅走鬼鐘，而係火警鐘，只要一響就要第一時間離開，如果慢慢着衫嘅話，隨時火神殺到就會好危險，所以記住一聽見響鐘，衫都咪着就走啦！
撰文：小德