話說大軍有個老友，名副其實係網絡釣魚高手。事關佢每晚都會趴喺電腦前，透過網上聊天工具嚟溝囡囡，跟住約出嚟行街、食飯兼食免費餐。據佢講，平均每個月都啅到兩三個FOC囡囡，真係抵玩又好玩喎！不過我就最睇唔過眼，佢網上溝女之餘，為咗慳埋酒店錢，而去囡囡屋企曳曳。雖然我同佢講過好多次，但佢都覺得冇問題，反而認為我係杞人憂天。殊不知佢上個禮拜，終於賴咗嘢！
話說嗰晚佢約咗條女喺老深吔飯，跟住撩囡囡過夜。囡囡話屋企有朋友同住，叫佢去酒店開房，點知老友諗縮數，假稱如果屋企冇人嘅話，喺屋企玩會更有親切感。囡囡又聽佢支笛，去到屋企樓下，囡囡先入屋，睇清楚冇人至叫老友上去，跟住就帶老友入房。老友覺得好奇怪，皆因間屋係一房一廳，若然係合租嘅話，點解只得一間房？唔通佢哋孖鋪。不過呢個時候，佢同囡囡喺度打緊茄輪，慾火焚身嘅佢就冇再諗落去。殊不知到入正題嘅一刻，突然有人用鎖匙開門，老友諗住着番衫啦！點知囡囡卻一手推佢出露台，仲叫佢執埋啲衫，由露台爬落街添！原來囡囡同住嘅並非女性，而係佢個佬，囡囡仲話佢個佬係流氓，若然畀佢知道大家都冇運行！老友見狀即刻二話不說，拿拿臨爬咗出去，真係嚇到鼻哥窿都冇肉呀！
撰文：大軍