做得AV女優，身材、樣貌同性技都有質素就係人都知，不過好多女優本身仲身懷不同絕技，好似日本AV界嘅佳山三花咁就係空手道黑帶三段、美國四仔女星Lisa Ann仲可以自編自導自演，而唔少女優更係唱K高手。唔信？睇吓美國四仔K歌會嘅實況就知喇！
一間良心企業為咗令旗下嘅員工安心、專心又忠心咁為自己打拚，除咗定期加人工同福利之外，亦需要安排不同聯誼活動，等上中下層有更多機會溝通，同時亦令大家有排解壓力嘅渠道。就以美國四仔界為例，AV廠為女優安排嘅節目好多，最常見就係舉行狂歡派對，畀女優同男優癲番晚，仲可以吸引AV迷畀錢入場，趁機會大賺一筆添。除此之外，唱K亦被認為能夠有效減壓，所以AV廠就搞咗個四仔K歌會喇。呢個四仔K歌會舉行嘅原因，要由2000年講起。當時一位52歲嘅男優Seymour Satin退休之後，喺美國加州買咗一間酒吧，後來就將酒吧變成卡拉OK會所，吸引唔少男優同女優捧場，而每個星期二總會特別多男優女優到場，所以會所就將每個星期二命名為「脫星星期二」，吸引到好多AV迷一睹脫星們嘅風采，兼且一齊唱K。
後來，拉斯維加斯一間有脫星投資嘅會所又引入呢個活動，變成今日依然於每個星期二舉行嘅四仔K歌會喇。呢間會所入面嘅格局唔似我哋家陣成日去嘅K房咁有私人空間，因為成間會所其實同一般酒廊冇分別，一樣係一個大廳，有個舞台仔以及有DJ打碟。不過，咁就最好不過喇。事關如果大家都只係坐定定於自己嘅K房，又點可以同班四仔脫星打成一片呢。雖然參加四仔K歌會嘅脫星唔少都係退休女星，但係亦有好多意欲嚟飲酒、唱K減壓嘅現役美人兒，所以入到場，千祈唔好怕醜，一於點隻情歌再主動同心儀脫星，你一句，我一句。若然歌喉好，唱得夠冧，隨時可以令脫星投懷送抱，大送秋波，要抽水就喺呢個時候喇！
至於自覺冇膽一展歌喉亦唔需要失望，因為脫星自己亦會唱出慾火，成日都會因為唱得太High邊唱邊剝，直情好似跳艷舞一樣。另外，為增加氣氛，亦唔想大家因為不斷大展歌喉，嗌到把聲都坼晒，所以四仔K歌會不時於中場加插特備節目，好似由脫星演出小型話劇、抽獎以及各種小遊戲。至於乜都唔想玩嘅朋友，亦一樣唔會悶，因為大會亦有安排攝影環節，參加者可以先詢問一下心儀嘅脫星，睇吓佢得唔得閒，得到其首肯之後，就可以去到會所早就安排好嘅角落，唔係拍四仔，而係拍硬照啫！上文都提及過，四仔K歌會經常有已退休嘅脫星捧場，攝影活動就剛好可以畀佢哋嘅Fans重溫偶像嘅風采喇。
撰文：賢