代表三級電影院線嘅最後一個橋頭堡，位於佐敦官涌街嘅官涌戲院，喺今個月十四號宣告光榮結業，由於結業後喺門口冇貼任何通告，唔少老友嚟到先望門興嘆，只能從記憶中緬懷昔日光輝歲月。
自從1987年11月11日香港政府實施電影三級制之後，表面上好似對香港電影業界嘅監管嚴咗，實際上就畀三級色情電影多咗一條生路，於是有片商專門喺歐美購入艷情電影來港放映。
喺八十年代，由於巿場太大，淨係靠外國色情片，根本唔夠供應，事關當年好多正經戲院都會喺早場同公餘場播鹹片，於是造就日本色情片應運而生，由於故事豐富，拍攝意淫，女角討好，於是吸引咗唔少觀眾捧場，最後更組成自己嘅三級院線。
全盛期有三條專放三級片嘅院線，包括日活、巨人以及奧斯卡，戲院就有成十幾廿間，分布香港各個地方，比較出名嘅戲院包括油麻地、國華、彩鳳、翠鳳等，最近休業嘅官涌戲院，已經係後期加入。
大約自九七金融風暴開始，三級片開始走下坡。全盛期三級片嘅戲票，係收正場票價，但自從市道轉差，票價就由五十蚊一張減到三十蚊，最後更低至二十蚊全日任睇，跌幅驚人。更驚人嘅係，入場人數每日只得百零人，好以官涌戲院咁，結業前每日入場人數一百人都唔到，真係想唔執笠都幾難。
三級院線全盛期，佢哋每個月都會有新片推出，為咗吸引觀眾，不時度埋啲好抵死嘅戲名，好似《淫賤打樁機》、《插班女學生》、《萬能插蘇人人插》等，仲有最經典嘅《弊傢伙！地鐵有色魔》同埋《我很寸但我很淫亂》。到咗農曆年，又會有賀歲三級片，好似《新春大拮大利》、《後庭花開富貴》等，呢啲戲名相信亦會成為大家嘅集體回憶！
撰文：小德