今年冬季天氣較往幾年冷，出親街都見到行人穿上厚厚嘅衣服，不過好多外國人就會覺得我哋奇怪，溫度只係十幾度，使唔使咁大陣仗呀？佢哋感到錯愕又唔出奇，因為歐美地區冬季往往凍到跌破零度，即使係咁凍，亦有好多人唔着衫出去玩！吓？唔着衫？冇錯，好似德國Braunlag咁，每年二月至三月期間都集結咗一班勇悍無匹，無視冰天雪地嘅男女齊齊剝剩條底褲滑雪！因為早在2009年開始，當地就舉行咗一個國際裸體滑雪大賽（Braunlage Nude Sledging World Championship），招徠大量滑雪好手參加，為展示佢哋嘅勇敢本色，仲要佢哋剝光上身上陣，不難預料現場波濤洶湧，令滑雪場變得熱辣辣！雖然今年嘅一屆已經於二月圓滿結束，仲有一名男士贏得冠軍及捧走一千歐元獎金，但係出年仲有機會，大家就趁呢段時間練好身子到時參加埋一份。當然，唔參加嘅話都可以做現場觀眾，一樣睇得好過癮！