好多男女喺啱啱拍拖時候，表現異常溫柔體貼，但當感情一穩定落嚟，就會出現許多問題，而最常見嘅就係唔喜歡畀另一半成日管住，令佢失去自由，冇晒自己嘅空間。大家有冇機會遇上呢啲問題呢？其實喺你嘅面相已可以搵到答案。
原來喺相學上，可以預測到你嘅另一半係咪要高唱自由，唔喜歡受管束，如果係嘅，喺拍拖前就要好好諗清楚，因為呢種性格係冇得改。就算老婆幫佢生埋成竇小朋友，都係改唔到佢哋愛自由嘅性格，到時就要一個人撫養孩子，認真要諗清楚。
有呢種情況就係睇佢哋面上嘅骨，如果好多部分嘅骨都凸晒出嚟，例如眉骨、顴骨、額骨、腮骨、鼻骨等，呢種人主觀性超強，唔喜歡受人管束，更唔會聽人話，包括伴侶嘅意見，佢哋更會為自己嘅理想，而放棄家人！
另一種就係成塊面睇落去一啲骨都冇，圓潤有肉，呢種人唔係因為主觀，而係冇主見，有問題出現嘅時候，自己揸唔定主意，如果另一半喺佢旁邊畀意見，佢哋就會覺得伴侶好煩，你愈講佢就愈唔聽，最後更會因為爭拗而導致感情出問題。以上兩種面相嘅人都唔喜歡畀人管，連喺床上亦都一樣，唔喜歡與伴侶談論性事，因為唔想聽見伴侶嘅意見。
撰文：小德