過江女神：畀仔賣甩PR追討感情損失
本地市民入稟向電子貨幣卡公司追討「感情損失」，有人問究竟呢段感情值幾錢同埋點衡量，真係有待深究，但喺澳門夜總會亦有PR有樣學樣，誓言要向各恩客追討「感情損失」，歡場你情我願，究竟阿妹有乜損失先？
怒火中燒
歡場無真愛，人客入場玩係你情我願，明買明賣，邊有得計較「感情損失」先？喺澳門×城夜總會工作嘅PR可可一講到感情呢兩個字，即時怒火中燒，情緒不能自制，差啲想揼人咁款，使唔使咁激先？「激？你都唔知我付出咗幾多、畀人客騙咗幾多次，我今日仲可以坐喺度同你傾，經已非常自制，畀我後生兩年，我真係要登報數臭佢呀？」嘩！玩到咁大，不過登報非一般小市民可以負擔，阿妹不如用網上數臭會實際好多囉！
但話說回頭，阿妹你話畀人呃，究竟係騙財定騙色先？「兩樣都唔係，係時間，你都唔知依家啲人客幾衰，明明約好你幾時幾日入場玩，又叫我扮靚啲，點知等足一日都唔出現，而我為咗等佢，有枱都唔坐、有街又唔出，仲要不只一次，我好傷心囉！」傷心就梗架啦，不過亦顯示出你好蠢啫！
真心奉獻
雖然阿妹蠢到連玩家都信，但我好想知佢點樣追討「感情損失」，莫非阿妹諗住嚟香港入稟咁犀利？「你仲講風涼話，你都唔知我哋班PR幾陰功，須知道我哋陪人客時，真係攞個心出嚟架，唔單止咁，人客要劈酒我哋絕冇擰頭，永遠奉陪到底，無非係希望人客盡興同時會記得我哋存在，下次再有需要會搵我呢個朋友。之不過今日我唔會咁蠢，假如啲熟客再搵我陪坐，我會先同對方講包我過夜至肯坐低，或叫對方落訂，例如名錶、首飾，即使現金都冇所謂，一句說話就想我等，發夢啦你！」
可可小檔案：
年齡：19歲
三圍：34、22、33
身高：5呎4吋
撰文：祖
攝影：凱