利用明星夢

佢哋呃囡囡嘅方法，不外嗰幾招，今日就同大家分析一下，最常見就係同囡囡講，佢哋有好工介紹，以前會話介紹入廠，但近年啲女仔好多都練精學懶，話介紹做侍應生會比較受歡迎，因為做侍應冇喺工廠咁辛苦，人人都願意去做。而且做侍應，可以一嚟就叫佢哋去夜場返工，喺耳濡目染底下，好多囡囡好快就會不甘食貧，情願褲頭一鬆，做小姐好過。

第二招，亦都係近年興起，就係介紹佢哋做歌星明星，原來好多囡囡都發明星夢，特別係一啲中產家庭成長嘅囡囡，佢哋經濟富裕，不愁兩餐，唔急於打工養家，於是雞頭就會用「明星夢」嚟吸引佢哋，好多囡囡都會上當，有啲仲瞞住父母出走添。

容易賺大錢

但出到嚟大城市，要生活談何容易，囡囡起初都會叫家人寄錢過嚟接濟，當基本生活解決後，雞頭就會介紹佢哋去一啲同樣係騙子開嘅模特兒公司，讓佢哋接連受騙，到咗山窮水盡，父母都唔肯再寄錢嘅時候，雞頭就會游說囡囡自力更生，而最好就係做三陪，一來可以練習歌藝，二來可以賺錢，三來有機會認識娛樂圈嘅猛人，增加入行嘅機會，於是囡囡都會毅然答允。

最後一招就係擺明車馬叫你做小姐，目標會係一啲比較成熟嘅囡囡，佢哋出過嚟打工，見過世面，雞頭就直接動之以利，講喺邊處做小姐極之容易賺錢，仲以某人為例，一年唔夠就衣錦還鄉，好多囡囡受唔住誘惑，把心一橫，決定下海，但想要賺錢，又邊有唔辛苦架！

撰文：娟娟