長毛華：最近識咗個女仔，同佢拍拖唔夠三日就已經上床。起初每日都會同佢曳曳，點知過咗一個禮拜，當我提出上床嘅要求時，佢突然拒絕我，理由係話唔想我哋嘅關係只係得性愛，然後幾日都唔畀我掂佢！查實當初係佢撩我上床先，更何況我同佢曳曳只係覺得親密啲，又唔係代表唔愛佢，點解女人會咁諗㗎！
小雯：你班男人嘅心裏，唔通只係得性愛兩個字？日日都想曳曳，你當對方係洩慾玩具咩！女人最重要係安全感，當初同你曳曳可能係想快啲同你確立關係，但後嚟發覺愈嚟愈唔對路，每次同你見面你都話要上床，係女仔都怕咗你，快啲返去檢討吓啦？
老占：當初又係佢撩你上床先，依家又話唔想你哋嘅關係只係得性愛，真係乜都畀佢講晒。如果拍拖耐咗都冇行埋，女仔就會懷疑你係性無能，否則點會唔會主動掂佢。如果你經常同佢曳曳嘅話，又會話你當佢係吹氣公仔，同佢一齊嘅目的就係想洩慾，咁煩嘅女人，勸你都係早啲飛咗佢。
明仔：其實不論男女都會有性慾，雖然你哋嘅關係可能係從性開始，但唔代表性喺你哋嘅關係中，係每次見面都要進行嘅例行公事。可能女方擔心你，誤以為佢好開放，或者喺你心目中，認為佢只不過係性對手而已，先至會有咁嘅反應。如果你真係愛佢嘅話，不妨同佢傾訴心事，應該會令關係更加圓滿。