易呃易氹

牙長代表健康長壽、有衣食，若然你同呢種女人喺埋一齊，通常佢都好少病痛，分分鐘仲長命過你。而牙齊，代表品格高尚，有口德、口齒，說話唔多，但勝在句句真，即牙齒當金使嗰隻。同佢一齊絕對唔會呃你，但你呃佢就好容易，事關佢無乜機心，就算穿咗煲都好易氹番佢！

牙白，表示腸胃、肺部功能零舍好，即係食得飲得、做得，夠活力，呢種女人成日都講飲講食，做佢男友不但使錢勁，仲要陪埋佢食，真係少啲精力都頂唔住，但好在佢做得，返屋企自然會搵你喺床上減肥！至於笑時不露齒，係含蓄、守秘密嘅象徵。幾樣嘢加埋，就係一個難得嘅好女人。

擇偶挑剔

呢種女人，做事認真負責，進取時更不忘穩健，識得搏殺，又識得享受人生。至於搵錢勁，但使錢仲勁，呢種女人好鍾意飲飲食食，又鍾意盡情玩樂，同佢做朋友就最開心。

另一方面，呢種女人比較長情，雖然朋友滿天下，但真正成為知己者，並唔係太多，事關飲飲食食、嘻嘻哈哈就冇乜所謂，但一旦要選作拍拖對象或生意夥伴，阿妹就會有好高要求！尤其係選擇終身伴侶，咁就更加嚴謹，因為阿妹條件多多，除咗人品、外表，仲需要強勁嘅性能力咁至可以滿足得到，所以自問冇乜耐力嘅男人，都係避之則吉，做個酒肉朋友算數喇！

撰文：祖