撰文：小德

咪租特別房

據一位前酒店保安經理透露，原來因為保安理由，酒店有幾間房裏面，係設有閉路電視，以便監視房中人物或者保護財物之用，由於係特別用途，所以平時呢幾間房係唔會租畀客人嘅，但有時房間爆滿，都會租出嚟畀客人使用，而保安部一定會關掉錄影設備，以免侵犯正常客人嘅私隱，但內地好多酒店都會附設夜總會，而佢哋往往會租用呢啲半夜都未租出嘅空房。

所以好多時呢啲「特別房」就會交畀夜總會負責租出，管房同事負責帶客人入房，如果見到靚女，就會不守公司規矩，串同保安部同事，開啟錄影設備收看，起初佢哋都係出於好奇，當睇四仔電影，但如果發現客人身份特別，就會生起貪念。

設備最先進

另外，家陣嘅偷拍設備，實在太先進，細到一粒電視示顯燈大小嘅偷拍鏡頭都有，令人防不勝防，而且偷拍器材價錢超便宜，只要花點錢就可以喺電器巿場購買得到，於是有啲酒店員工，喺自己本身慾念驅使或者受唔住別人金錢誘惑下，鋌而走險，喺酒店房嘅隱蔽處安裝偷拍鏡頭，只要每日嚟更換記憶卡，就可以將客人嘅做愛片段攞走，要嚟自娛或者出售圖利。

而據知情人士透露，正常嘅酒店比較少呢啲事發生，但一啲附有夜總會、桑拿或者大量時鐘客幫襯嘅酒店，大家租住後就要特別小心，不妨攞部手提電話出嚟，睇吓有冇電流干擾，係就換房，咪一夕風流後遭人勒索或者做咗四仔男主角就唔好啦！