少女吸引

每逢周末假日，於火車站附近，不難見到三五成群嘅年輕人準備北上，而今年二十六歲嘅阿健（化名）就係其中一分子。據了解，阿健不時都會跟朋友北上消遣，而深圳的士高就係佢常到之地。佢話：「其實內地D場不嬲都好受港男歡迎，其中一個原因就係女多，而且易溝，有啲女仔更會主動撩你玩，唔使自己嘥口水同彈藥，唔似得香港啲女咁高竇。」阿健笑言：「身邊有幾個老友仲話，內地啲女仔表現主動，對於蒲開香港場嘅人嚟講，反而有啲唔習慣添！」

閃電洗劫

阿健亦明白到內地D場龍蛇混雜，危機四伏，絕對唔可以掉以輕心。佢話：「好似我蒲開嗰間D場咁，位於福田區一間酒店地下，有唔少妓女流連搵食，而客路主要係廿零歲嘅香港人，原因離不開消費低、多女仔及容易濫藥。」

有啲女仔更勾結不法之徒，利用美色去誘騙港男，阿健身邊有個老友就曾遇過類似經歷。佢話：「當晚我哋識咗一班女仔，玩到凌晨三點幾先離開，其中一個女仔話屋企冇人，問老友有冇興趣去佢屋企過夜，老友以為有餐食，拿拿臨同條女跳上的士，我喝都喝唔住，點知喺途中畀幾個彪形大漢截停的士，然後夾硬將佢拉落車，唔夠廿秒，佢身上嘅財物已被洗劫一空。事後，我同佢講，呢次佢只係擦傷手腳，已經算係不幸中之大幸，若然對方再狼啲嘅話，隨時有生命危險！」

其實，以上情況屢見不鮮，但仍然有人中招，阿健認為係港男太急色所致。最後阿健提醒大家：「所謂『色字頭上一把刀』，就算食嘢都要睇時候，更何況呢個世界有幾多免費餐呢？」

撰文：娟娟