另起爐灶

自從內地開始嚴打，執法人員幾乎每日都到夜場巡查，夜店生意自然大受影響，據講，深圳某間桑拿整日生意只得三單，休息室內客人寥寥無幾，冷清得嚇人，生意額少得連支付水電費都未夠，終於捱唔住而結業。至於部分現存夜店亦為免麻煩而唔敢營業至夜晚，頂多7點就會關門，店內嘅小姐只能於員工休息室內呆坐、打瞌睡。

而經理嘅情況亦唔好得去邊，事關部分場所推行佣金制，單靠底薪嘅日子的確幾難捱，迫使佢哋另覓工作，又或者另起爐灶。一位前桑拿經理阿忠表示：「其實好多人早已收到消息，話會嚴打到十月，但估唔到會帶嚟咁大影響，好似我以前任職嗰間桑拿，執法人員每日都嚟巡查一、兩次，根本冇辦法做生意，喺迫不得已嘅情況下，我惟有另起爐灶，但唔係開設另一間夜店，而係搞『外賣』生意。」

飯局揀女

所謂外賣生意，當然唔係送餐嗰種，而係電召形式經營淫竇。阿忠續話：「家吓嚴打未完，唔少玩家都唔敢冒險出嚟玩，而呢種電召服務，反而為佢哋省卻唔少麻煩，因為客人可以當作私人聚會，唔會有執法人員嚟巡查，比起去夜店玩安全得多，而且喺以前工作嘅一段時間裏面，我認識咗唔少熟客，加上好多桑拿技師都願意跟我出嚟搵食，所以我認為絕對有得做。」

至於客人如何挑選心水囡囡，原來有幾個途徑，其中一個就係色情飯局。客人需要致電預約，冇幾耐就會收到短訊，內容係付款方法，過數之後，就會再收到另一個短訊，呢次嘅內容就係飯局嘅時間、地點。於飯局之中，每個客人身邊會有一位小姐服侍，攬攬抱抱，悉隨尊便，如果啱心水嘅話，就可以乘坐專車到附近嘅酒店進行交易。

物色新女

夜場經理經營賣淫活動，並唔係新鮮事，但係喺嚴打日子裏面，反而造就一個搵銀機會。阿忠話：「而家身邊有一班長期捧場客，當然唔愁冇生意啦！不過，我仍然會物色有質素嘅囡囡加入我哋嘅行列。一般嚟講，初時啲囡囡只會應承做兼職，但當佢哋知道每次短聚後都能夠獲得豐厚酬金，通常都唔介意繼續做落去。」

此外，為免惹起有關部門注意，負責人安排飯局嘅地點每次都唔同，亦只會喺飯局當日先通知客人，以免執法人員放蛇。同時，客人一定要先付款，會唔會畀人搵笨，咁就真係試過先知喇！

撰文：娟娟