住宿騙子

據內地某大年輕人網站調查所知，佢哋發現咗三宗最常見嘅考生騙案，今日就同大家分享一下，引以為鑑。據調查所知第三位係住宿騙案，原來好多地區嘅考生，未必係安排喺自己嘅區裏面考試，特別係鄉下地方嘅考生，好多人都要去城巿應考。考生為免舟車勞頓，都會幾個星期前就會去定考試嘅城巿，搵間近考場嘅旅館入住，一來熟習地方，二來可以專心溫習。騙子亦睇準佢哋嘅心理，喺考場附近專門誘騙佢哋去啲九流旅館，參觀時一間大房，樣樣齊全，每日收費幾十蚊。

考生接受，就要先付十幾日嘅房租，畀錢之後旅館就會不斷要考生搬房，卒之就大房變細房，房裏面樣樣都冇，仲有好多苛索嘅雜費，例如一到半夜，就會冇水冇電，要就要加錢，再唔係又嘈又打交，最後迫到個學生離開為止，當然所交房租一律冇得退款。

美色陷阱

諸如此類嘅住宿騙案，可以話層出不窮，但就算入住到一間正常嘅旅館，亦都會有其他騙案嘅發生，就好似據調查第二位嘅美色騙案，由於考生都係一個人出門，冇父母監管，當讀書讀到悶嘅時候，就會四圍出去玩，而一啲美色騙子就會出動。

通常見一個年輕人喺街上遊蕩，呢啲女騙子就會出動，約佢哋一齊玩，有啲純粹係賣淫，但有啲係想混入考生嘅房間，將佢身上嘅錢偷光，有啲仲狼死嘅，就係布局捉黃腳雞，當兩人入房親熱時，就有第三者出現，話係少女嘅父親或者係男朋友，屈考生大筆遮醜費，考生邊有咁多錢？於是騙徒就會將考生嘅考生證扣押，要考生父母攞錢嚟贖番，父母得知後，為免誤了兒子嘅考期，大多數都會輕易將錢交給騙徒，事後更不加追究，於是呢啲初出茅廬嘅考生，就成為佢哋嘅目標。

假必勝答案

至於最多人受騙嘅，就係必勝騙案，考生喺考試前夕，大多數患得患失，騙徒就看準心理，於是喺街上或者網上，不斷宣傳自己有高考必勝法寶，當中有開腦靈符、聰明藥水、高科技出貓套裝等，總之係幫你喺高考裏面戰無不勝，取得好嘅成績。

呢啲新奇物品價錢由幾蚊到萬幾蚊不等，有啲高考試題答案，話係內部機密，好辛苦至攞到出嚟，一科問題連標準答案嘅套裝，開價就要兩千；仲有啲高科技產品，話可以喺考試現場聽到或者顯示到標準答案出嚟，照抄就可以攞得高分，開價七千。

而最多人上當嘅，就係真人代考嘅騙局，收費每科四千，佢哋見面時講到頭頭是道，兼且有齊考生證同埋同考生一樣嘅考場證明，話到時喺試場只要交換寫上對方嘅名，就會搞掂，但全部都係呃人嘅，奉勸各位考生，考試冇捷徑，唯勤是舟，而且要帶眼識人，千祈咪輕易信人呀！

撰文：賢