嘴靚齒齊少說話

據玄學家梁瑋鈞指出，一個人着幾多，食幾人係整定嘅，從面相學中係可以睇出一啲端倪，靠打工有冇得發達，就要睇把口，重點唔係大小厚薄，而係把口生得正唔正常，會唔會歪嘴，包括埋佢講嘢同笑嘅時候，最緊要正常，唔好歪埋一邊。

其次就係牙齒要齊，唔好凹凹凸凸，或者出現牙罅。牙齒排列唔齊，性格比較亂嚟，唔喜歡守規矩；而有牙罅就係講嘢欠技巧，經常會招惹是非。所以牙齒一定要齊，咁畀觀眾嘅感覺，就會純品啲，加上講嘢識得氹人，咁樣囡囡想唔紅都幾難。

至於少講嘢，梁師傅套用俗語：「言多必失」勸勉大家，女士們本身就容易惹是非，人緣關係本來就係想要得到更多人嘅支持，但錯用咗去招惹是非，咁就浪費晒啲桃花，所以喺娛樂圈着重多曝光，少發言，一講錯嘢是非纏身，到時想紅都幾難。

眉毛細長彎似月

無論喺中西嘅相學上面，眉毛都佔住十分重要嘅地位，佢包含住人生中，兄弟、友情、智慧、財富同埋性觀念嘅秘密，而咁多嘅眉毛當中，最好嘅眉毛，就係以細長似彎月嘅眉最好，眉身絕不能起角，更要不散不連，冇畀紋侵痣破，咁就會最好。

因為眉身冇起角，表示囡囡智慧好高，做人做事十分圓滑，而且眉生得有力，就可以得朋友和兄弟嘅幫助，有人會話佢係獨女冇兄弟咁點算，據梁師傅講兄弟喺現代嘅意義，係指同事或者同行嘅朋友，如果得到佢哋嘅幫忙，接戲嘅機會都多啲啦。

另外，一般眉毛生得細長似彎月嘅人，通常都係溫柔慈祥嘅母親，所以擁有呢種眉嘅囡囡，特別容易受男士們嘅歡迎，異性人緣運極高。喺性生活上面，佢特別就得人，所以同任何對手都可能交足功課，唔會令觀眾失望，自然吸引大批觀眾支持。

眼睛黑黑圓又大

據梁師傅講一個囡囡點樣至可以迷倒人，最重要就係有冇擁有一雙明亮而有神嘅眼睛。眼睛係靈魂之窗，一個囡囡雙眼有冇神彩，絕對影響佢嘅前途，而眼睛嘅好壞，唔係講佢大定細，而係要睇佢嘅黑白比例，黑多白少，就係最理想嘅眼睛。

據梁師傅講，囡囡雙眼如果眼白少，眼珠大嘅話，會畀人有楚楚可憐嘅感覺，特別容易吸引觀眾，但要求一定要黑，有些眼珠偏啡色，原來又係另一回事，所以要得異性緣，一定要眼睛又圓又黑，咁樣就可以迷倒天下男人成為你嘅支持者。

最後，眼大得嚟仲要有神，據梁師傅講有神係要由眼珠散發出嚟嘅光彩，一個人行運或者充滿自信就會閃出光彩，搵正呢啲囡囡嚟做新人，紅嘅機會自然大好多，當然，以上只係玄學家嘅推斷，想成名闖出名堂，都係要靠自己嘅努力同付出嘅。

撰文：小德

鳴謝：玄學家梁瑋鈞