本文重點
娟媽今日扮到靚靚咁樣，原來約咗中學同學見面，娟媽將全部戒指、頸鏈、名表攞晒出嚟，希望唔好失禮人。佢搭車時心諗大家都冇見一段日子，都唔知變成乜嘢樣，於是準時出現。喺餐廳裏面，正有個風度翩翩嘅中年男子等緊娟媽。
睇真有啲似電視劇裏面個三哥咁嘅樣，娟媽大喜：「你咁早到嘅？」那人認唔出娟媽：「你係……」娟媽：「我係小梅呀？」那人大吃一驚：「你係小梅，真係士別三日，刮目相看。」娟媽失望：「我變得好醜樣咩？」那人搖頭：「點會呢！只係福態咗，我一時認唔出啫，係呢？小梅你咁福態，呢十幾年，一定撈得唔錯呀！」
娟媽：「普普通通啦！你仲係以前咁嘅樣，一啲都冇變。」那人：「老啦！老咗好多！」娟媽面紅紅：「係呢！做乜咁好死約我出嚟呀！」那人猶疑片刻，最後吞啖口水：「我有啲好重要嘅心事想同你講。」娟媽低頭：「有乜嘢咪講囉！」
三哥激動：「咁我就開門見山，其實想搵你好耐，因為有啲嘢，你有我冇嘅，咁多年我都恨咗好耐，所以今日希望你無論如何都要應承我一次咁多，咁我死而無憾。」娟媽一笑：「你咁突然，人哋邊有準備喎！」
大家又估唔估到娟媽同學想要乜嘢呢？貼士係最後娟媽打咗呢個人一巴掌。
1. 想要求娟媽獻出肉體 2. 想要求娟媽講出秘密
3. 想要求娟媽借出金錢 4. 想要求娟媽付出青春
答案：3. 想要求娟媽借出金錢
解釋：原來呢個同學幾十年嚟都撈得唔掂，一見娟媽穿金戴銀，以為佢好掂，於是就話有啲嘢「你有我冇」、「恨咗幾十年」，就係指錢，最後希望娟媽今日就借啲錢畀佢，唔知娟媽誤會咗乜嘢，後來個同學仔同佢講清楚，於是娟媽一巴掌打埋去，打到同學仔暈得一陣陣。
小德