最近老友明哥打電話畀我，話佢由東莞落嚟深圳，連續遇到三個老千，竟然用同一個手法去呃佢啲錢，佢話呢個情況，十分嚴重，叫各位北行老友，認真要小心咁話。
至於呢三個老千用啲乜嘢手法，真係講都唔信，竟然扮港人求救。
明哥話：「話說前兩天去東莞，玩完一出某大酒店門口，就有兩個人走埋嚟，兩個人都三十歲左右，有一個仲包住頭，冇受傷嘅一個就問我係唔係港人，我咪話係囉！點知佢就話咁就啱啦，佢哋都係港人，仲遞咗張身份證畀我睇，冇花冇假。」
冇錢點求醫
之後嗰個港人就話佢兩兄弟上嚟玩，點知畀人打劫，搞到家陣冇錢返香港，於是想問明哥借幾百蚊，最後明哥見包頭嘅，好似畀人打穿頭咁樣，扮得咁逼真，應該唔會有詐，於是畀咗一百蚊佢哋，叫佢哋自己再想辦法，於是轉身離開。
明哥話：「走咗之後我至覺得奇怪，畀人打劫點會淨得番張身份證，而且有人受傷就更奇怪，因為內地啲醫院，冇錢唔會理你，你求醫時話係港人，佢哋會打電到香港確認咗之後至救你，到你家屬嚟埋單至放你走，冇得畀你自出自入。」
身份證粗糙
於是明哥覺得奇怪，點知去到汽車站，又遇到一個話自己係港人嘅男子，又咁啱畀人打劫冇晒啲錢，希望明哥借啲錢佢返落深圳，今次明哥睇清楚張身份證，張相一樣，但製作粗糙，九成係假嘢，於是明哥扮關心話：「要返深圳，我幫你買飛。」
點知個男人連忙拒絕，最後話自己仲要報警，明哥深知有詐，於是借意買飛，就速速離開，點知返到落嚟深圳，又喺羅湖城遇到一個，明哥接連撞到老千，真係佛都有火：「我一手捉住佢，話去搵公安！最後嚇到條友轉頭就走。」一聽見公安就咁驚青，九成係老千，所以大家北行時，真係要小心，係真正自己友至好幫呀！
小德