有時真係好懷念喺讀書住宿舍嘅日子，成班同學朝夕相對，感情不但變得深厚，偶爾更會互相整蠱，好似偷食對方嘅儲糧咁，諗起都覺得開心。不過睇完今日介紹嘅奇趣短片至知道，原來整蠱嘅方法有好多種，有啲更係非常出人意表！
文女同妍女既係宿舍同房，又係知交好友，經常玩埋一齊。今日文女一早起身煮早餐，但冇預妍女嗰份，肚餓嘅妍女見到文女食得咁滋味，個肚不斷咕咕叫，惟有睇電視分散精神。
呢個時候文女嘅手機響起，於是即刻撲去接電話。其實呢個電話係妍女打嘅，目的就係引開文女，趁機偷食佢嘅早餐。文女返嚟繼續食麵，食食吓竟然從碗中夾咗條四腳蛇出嚟！
妍女見到碗中竟然有條四腳蛇，頭先仲要起勢咁食，即刻衝入廁所嘔！文女見到妍女咁嘅反應，竟然喺度偷笑。原來條四腳蛇只係道具，用嚟報復妍女偷食而已，認真大整蠱！
阿豪