高薪招募男公關
據內地新聞網站嘅報道，呢班不法之徒，一共有十三個人，當中有男有女，話說佢哋知道每年三、四月開始係學生搵工嘅高峰期，於是向呢班入世未深嘅年輕人埋手，先喺一啲地區小報刊登招聘男公關嘅廣告，內容仲大字標題「月薪可達三萬至五萬元」。三至五萬，係好多人一年都未必搵得到嘅數字，自然吸引唔少人打電話嚟查詢，當有人打電話嚟嘅時候，佢哋就會搵專人回覆，報稱係大型KTV專招呼有錢有面嘅女賓，需要大量男公關。
求職嘅朋友聽到呢度，冇興趣嘅就會收線，但有興趣嘅，就會話想試一下，於是騙徒就會再講得清楚啲：「工作性質等於夜總會嘅三陪小姐，有需要嘅話，甚至要陪客人上房，發生性行為，而男公關嘅主要收入，就係靠客人打賞嘅小費。」
講到呢度可能有人會猶豫，電話裏面嘅人就會加多兩錢肉緊：「咪睇少啲小費，往往係三陪小姐嘅幾倍，甚至十倍，人哋坐一晚可能只得三百，但男公關坐一晚最少都過千，一個月計埋，單係坐枱費都兩三萬呀！何況仲有其他嘅收入呢！」
費用多多
講到呢度唔少求職者都會心郁郁，於是對方就會要你下決定：「如果有興趣我就同你約經理面試。」求職者答應，對方就會預約地點同時間，仲要求職者面試時帶備二百蚊報名費，兼且強調：「見工呢件事唔好畀人知道，你明白㗎啦！」求職者以為鴨店都係偷偷營運，所以唔想畀人知道，加上自己去做鴨，亦都唔會亂講。
面試成功之後，騙徒就要求職者畀千五蚊裝身費，費用包括做兩套西裝，同埋做護膚同整頭，有錢嘅學員就會畀錢，冇咁多錢畀嘅，騙子就會叫你返去諗吓辦法。
之後無論你有畀錢定冇畀錢，等得幾日都冇消息，就會打電去問佢哋有乜嘢安排，佢哋就會話擔心你冇經驗，未必應付得嚟，要接受一個實戰嘅測試，之後就提供一個報稱係資深鴨店媽咪嘅電話，叫求職者自行打去安排實戰測試。
試鐘考表現
當聯絡到媽咪之後，佢會好老實同求職者講，今次呢個測試要交五百蚊測試費，成功嘅就可以馬上安排工作，但如果唔想測試，或者測試能力唔符合要求嘅，都唔會獲分派工作，請大家另謀高就，好多求職者見走到呢一步，都會答允接受測試。
媽咪會分開時間，逐個安排去唔同嘅卡拉OK，見一個佢哋安排好嘅客人，客人會喺房入面毛手毛腳，之後仲飛擒大咬，要求職者係現場同佢親熱，好多求職者都未必接受得到，就算勉強接受到，表現都會大打折扣，於是媽咪宣布全部表現唔合格。
如果有人敢話投訴嘅，對方就會惡言相向，恐嚇會將求職者試鐘嘅事向傳媒爆出嚟，到時睇吓邊個冇面；何況家陣係當事人自己唔爭氣，表現唔出男人氣慨……畀人咁噴到一面屁，好多都算數了事。但有個求職者，自問當日表現一流，點解都唔合格呢？於是忿忿不平向公安局舉報，經佢哋一查，發現多達80幾個年輕人已經上當，呢個老千集團更多達十三人，當中媽咪同客人都係佢哋嘅人，所以年輕人出嚟搵工，一定要小心，咪好高騖遠呀！
撰文：小德