娟媽今日扮到成隻雀咁樣，原來佢約咗啲舊同學見面，大家十幾年都冇見，為咗唔畀人睇死，於是刻意打扮。下午時間去到五星酒店嘅咖啡廳，見到兩位靚太出現，一個係阿美，一個係阿芳，兩個都係娟媽讀書時期最好嘅同學。
原來阿美同阿芳都嫁過幾次，而且愈嫁愈好，娟媽只嫁得一次咁多，覺得自己唔及人哋，阿芳話：「咁你依家住邊？」娟媽認叻：「全港最大嘅大角咀。」阿美：「我知喇！西鐵線總站附近啲新樓嘛！成萬幾蚊呎㗎！」娟媽：「差唔多喇！」
阿芳：「咁你老公對你點呀？」娟媽：「當然好到不得了！我叫佢行東，佢唔敢行西！」阿美：「聽話冇用嘅，我哋做女人，最緊要夫妻間嘅相處吖嘛？你哋又點吖？」娟媽馬上認叻：「我老公佢尋晚至煩住我，足足拉住我煩咗成半個鐘呀。」
阿芳：「咁你老公認真犀利，我個衰佬，三分鐘就玩完。」娟媽得意：「阿美咁你呢？」阿美話：「唔好提喇！我老公一係成個月唔嚟料，一嚟料就煩足我成晚，搞到你瞓都瞓唔到，仲要你成晚做反應，搞到我聲都沙，你哋做乜咁樣望住我呀……」
各位聰明嘅讀者，大家估唔估到阿美所講嘅夫妻相處之道係乜嘢呢？
1.講嘅係夫妻間嘅做愛時間
2.講嘅係夫妻間嘅打架時間
3.講嘅係夫妻間嘅溝通時間
4.講嘅係夫妻間嘅接吻時間
答案：3.講嘅係夫妻間嘅溝通時間
解釋：阿美所講嘅係夫妻間溝通傾談嘅時間，但阿芳同娟媽都誤會咗係另一樣嘢，而阿美話佢老公嚟料，就係同佢講嘢，一係成個月唔出聲，一係拉住你傾成晚，仲要阿美唔瞓做反應，就係點頭同埋答係呀、好呀，所以搞到聲都沙埋，而並唔係娟媽咁諗叫床叫到聲都沙呀。
小德