全裸滿場飛
老家原來喺捷克嘅靚女Alexandra搶先回答，佢話：「以前細個就好恨做模特兒，一來模特兒大部分都好靚女，二來佢哋只要着住最靚最新款嘅時裝，喺台上面花枝招展咁行兩行，轉兩轉，就可以搵好多錢，你話邊個細路女唔恨做？」
家陣畀你恨到做模特兒，點解又話試過一次就怕怕呢？Alexandra話：「我發覺模特兒真係一門專業，並唔係一般人心目中，只係着件衫行個圈就可以，我嗰次去客串，令我明白到，佢哋由內到外，由後台到前台，每一個細節都係專業嘅表現。」
Alexandra繼續：「就算只計剝衫我都比唔上佢哋，我哋拍慣四仔片，以為剝衫好簡單，將扣一解，拉鏈一拉就可以，原來唔係呢回事，佢哋由舞台一轉入後台，就開始剝衫，之後係全裸咁樣走返埋去自己嘅化粧枱，準備着下一輪嘅衣服，時間除咗快之外，佢哋一啲都唔尷尬，個膽畀我哋啲脫星仲要大呀！」
遭上下打量
Alexandra面紅紅咁話：「大家可能唔知，後台嘅人比片場仲要多，而且男人嘅數目都唔少，廠商代表、設計師、化粧師、髮型師、舞台導演同埋佢哋嘅助手，雖然佢哋都好專業，但佢哋嘅眼神就令我頂唔順，特別係當我光脫脫嘅時候。」
令囡囡頂唔順嘅，並唔係佢哋鹹濕嘅眼神，而係上下打量，審視模特兒身上有冇任何出錯嘅眼神。Alexandra話：「片場男同事嘅眼神我早就習慣，就算幾鹹濕嘅都冇有怕，但好似畀人檢查咁樣，我就真係頂唔順，所以下次有咁嘅演出，都係要諗過先。」
至於另一位靚女Axelle Parker又點呢？佢話：「我喺後台畀人上下打量，呢層冇乜問題，反而我最感壓力嘅係台前演出，每一步都同平時行嘅唔同，萬一出錯，真係醜死人，成千上萬對眼望住你，仲有電視同埋相機，你話有乜蝦碌，真係邊度都唔使去。」
步法有排練
你上台演出前，有冇特別學過點行點走呀？Axelle話：「有呀！我除咗演出當日一早到現場熟習環境同綵排之外，事前我仲搵個做模特兒嘅朋友，教我點樣行，點樣停，同埋點樣轉身，單係練呢幾招，就練咗成個星期，唔係我都唔敢上台。但係到咗綵排嘅時候，大會用嘅音樂，竟然同我嘅步法唔啱拍子，於是行得特別差，我幾想唔做！好彩後來舞台總監派個人教我點走，但足足搞咗半個鐘，離開場就剩番一個鐘都唔夠，冇得綵排，只能夠自己記住。」
咁最後點呢？Axelle話：「出場前惟有乜都唔諗，只記住拍子，最後總算順利演出，但發覺壓力大到不得了，冇辦法，鬼叫自己小小事都好緊張咩，我男友仲投訴，話我接咗個Job之後，頭尾成個月都冇心情同佢曳曳，所以如果有下一次，真係未必會接。」原來係咁，唔緊要，咪專心拍戲，滿足多啲Fans囉。
撰文：小德