要聞港聞

工業意外爆不停 檢控豈容歎慢板

香港致命工業意外宗數,多年來居高不下,致命工業意外接二連三,令大眾不得不關注職業安全事宜。呢,回顧2022年工傷及職安大事,共錄得27名工人死亡。事實係每年嘅工業意外,多年來維持喺每年約20宗,反映現行職安健法例欠缺阻嚇力,未能促使僱主公司有效防止任何工業意外發生;此外,有關法例塵封20多年未有更新,確實應修例如提高罰則以加強阻嚇力。
工業意外頻生,有關注團體認為係反映勞、資、官3方面嘅職業安全意識明顯較以往薄弱。呢!立法會法案委員會正審議修訂職安健罰則嘅草案,政府曾建議循簡易程序審訊罪行嘅檢控時限由半年增至一年,處方就指有啲嚴重且有可能涉及相當高個人罪責嘅案件,處方要有充足時間調查喎!
阿哥!使唔使斟杯茶再食個包吖?多名議員質疑太長,政府考慮意見和檢視搜證程序後,將相關罪行檢控時限改為9個月,較原定期限增加3個月。可見事在人為,局方又指,有議員提及嚴重意外嘅調查,應盡快完成,畀工地持責者及早了解意外原因並改善,局方考慮意見和檢視搜證程序後,建議修訂為9個月。
有議員都話樂見政府從善如流,冇堅持要由半年增至一年,依家「中間落墨」,改為9個月,算係回應業界訴求。事實上,工業界亦反映,譬如意外發生喺較大嘅地盤,檢控期太長會影響運作,故平衡各方利益「攞個中間位」;不論僱主或僱員,都唔希望拖延搜證及檢控期,發生後盡快查個水落石出,減少瞎折騰,大家都有好處。
此外,草案原建議未有每周檢查吊重機、起重機械和吊船嘅罪行,更將最高罰款由20萬元調低至10萬元。呢個建議引來唔少議員不滿,有議員直指近排多宗涉及機械安全嘅嚴重職安健意外,好似秀茂坪安達臣道天秤倒塌事故、紅館演唱會塌屏幕事故,一再說明涉及機械安全被嚴重疏忽,實在不應調低罰款,計功夫茶認為,理應加強罰則,應由20萬個大洋加至40萬個大洋,人命關天,豈能兒戲?今當局稱考慮後同意維持罰款不變,其實係相當保守,亦欠缺阻嚇力!當然,正如有論者認為,罰則嘅最終目的並非希望係懲罰,希望最終能提升各方嘅安全意識。呢方面,政府需加大職安健宣傳力度、提高整體社會職安健意識,更重要嘅係全面檢討現有地盤安全管理制度,切實執行全部有關安全條例。勞工處要加強實地巡查,派出專業人員檢查器械等。
總之,唔係吹吹水,唔抹嘴嗰隻,凡事求求其其,咁就必定死得人多!注意職業安全,不必「動若脫兔」,而係小心駛得萬年船吖老友!
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500